▴ what does the fox say? ▴

Þegar ég var að skrifa meistararitgerðina mína fann ég mér ótrúlegustu hluti til að gera annað en að skrifa, svona eins og að kaupa íbúð og fara ótal, ótal ferðir í Góða hirðinn. Þegar ég segi ótal þá meina ég óteljandi ótal. Ég held að ég hafi verið orðin fíkill á háu stigi. Þegar ég var búin að sanka að mér svo miklu dóti og allt of mörgum bókum þá ákvað ég að reyna að hafa smá hemil á mér. Þú veist, fara bara einu sinni í mánuði ekki einu sinni í viku. Það tókst ágætlega en mér finnst samt enn alveg rosalega skemmtilegt að fara þarna og gramsla og tala nú ekki um ef að ég finn eitthvað frábært á svo gott sem engan pening. Reyndar finnst mér verðin hjá þeim hafa hækkað óþarflega mikið en það er önnur saga. 

Allavegana. Í september á síðast ári þá keypti ég ótrúlega fallega mynd frá twamies á Etsy (önnur uppáhaldsbúð ef út í það er farið). Eftir að hún var komin til landsins tók endalausan tíma að finna ramma, ég viðurkenni þó að ég fór kannski ekki í allar réttu búðirnar en ég var alltaf með augun opin, en það virðist ekki vera til of mikið af römmum sem eru hvítir ferningar. 

Lausnina fann ég í Góða hirðinum um daginn. Ég keypti gamlan fallegan ramma sem passaði akkurat fyrir myndina og málaði hann hvítan. 

IMG_5778.jpg

Það eina sem þarf fyrir svona yfirhalningu er:

  • Málning og pensill.

Ég notaði LADY Interior Finish frá Jotun. Þetta er mjög þægileg málning á allt tréverk, hún er með akrílgrunni þannig að það er líka auðvelt að þrífa pensla og skítuga putta eftir á. 

Ég þurfi að mála þrjár umferðir á rammann. Hérna er hann eftir eina...

... og eftir þrjár.

Ég er mjög ánægð með loka niðurstöðuna. Líka algjör munur að borga ekki nema 100 kr. og eina kvöldstund af dundi fyrir rammann. Verkefnið tók mig ekki nema 3 tíma að þurktíma meðtöldum. Fínt föndur á mánudagskvöldi. Myndin úr rammanum fannst mér reyndar mjög falleg. Kannski finn ég heimili fyrir hana einhvern tímann seinna. 

IMG_5774.jpg

Rebbi litli á núna heima inni á baði. Mér finnst eitthvað svo huggulegt að hafa list á baðherberginu. 

Nú er bara um að gera að finna gamla ramma og mála þá í öllum regnbogans litum.

▴ nýtt útlit ▴

Á föstudagskvöldum, þegar ég er búin að borða pizzu og horfa á Útsvar, (og ef ég er ekki sofnuð) þá tekur við hið æsispennandi líf bloggandi 28 ára konu. Það fellst í því annað hvort að brjóta upp flísar eða, líkt og í gær, eyða öllu kvöldinu í að útfæra nýtt útlit fyrir síðuna sína. 

Ef þið horfið vel í kringum ykkur ættu þið að sjá ýmsar breytingar enda er umhverfið allt orðið mun veglegra. Gamla útlitið stendur enn fyrir sínu en það var hætt að þjóna öllum þeim þörfum sem vaxandi og dafnandi blog hefur. Ég er mjög líklega komin með mikilmennskubrjálæði eftr fjölda heimsókna á bað póstinn í síðustu viku. Facebook síða OG nýtt útlit. Sjaldan er ein báran stök. 

Helstu breytingarnar/nýjungarnar:

  • Nú er hægt að leita á síðunni í þar til gerðum search kassa á hægri spássíunni. 
  • Það er hægri spássía.
  • Hver póstur verður flokkaður í flokka (ha ha) og hægt er að skoða pósta sem tilheyra hverjum flokki fyrir sig. Sjá hægri spássíu (þessi spássía sko).
  • Nýjustu Instagram myndirnar mínar birtast í þar til gerðu grid-i, einnig á hægri spássíu. 
  • Að lokum er þetta líka bara miklu fallegra en gamla útlitið. Batnandi bloggum er best að lifa. 

Þar sem þetta var gert í hálfgerðu bríeríi í nótt þá eru allar ábendingar um það sem mætti betur fara vel þegnar. Þá biðst ég fyrirfram fyrirgefningar á þv´að ég er ekki búin að fara í gegnum alla gömlu póstana og flokka þá. Það mun koma hægt og rólega. Flokka flokkunin (ha ha) mun því þróast og verða betri með tíð og tíma. Yfir og út. 

▴ like me ▴

Eftir ótrúlega frábærar viðtökur við síðasta pósti (takk, takk takk!) ákvað súðin að splæsa í eina like-síðu á Facebook. Ég hugsa að það sé öllum í hag, þeir sem eru búnir að fá nóg af póstum frá mér um flísar og hillur losna við mig á newsfeed-inu sínu en þeir sem elska ekkert meira en lesa um framkvæmdir og fallega hluti geta like-að við UNDIR SÚÐ og fengið alla pósta og gott betur beint í æð. Frábært ekki satt, verum vinir!

▴ BAÐIÐ ▴

Það er komið að  því. Baðið er tilbúið. Það er búið að taka af því myndir. Síðasti naglinn var nelgdur í vegginn í gær um það bil 3 sekúndum áður en fyrsta myndin var tekin. 

Fyrst smá upprifjun. Svona leit baðherbergið út þegar ég flutti inn. Ekki svo slæmt myndi einhver líklega einhver hugsa en eftir að hafa búið hérna í smá tíma þá fengum við mjög mikla leið á panelnum í loftinu og vaskaskápurinn var einstaklega illa hannaður. Eina sem hann gerði (utan við að geyma vaskinn) var að taka pláss án þess að í honum væri nokkurt geymslupláss og hægt og rólega flagna og fara í taugarnar á mér. 

tumblr_lj7ewryLS11qgux35.jpg

Svo máluðum við loftið og veggina. Þá leit þetta einhvern veginn svona út. 

bad1.jpg

Svo var brotið og flísalagt, flísalagt og flísalagt. Þeir sem eru búnir að gleyma eða bara hafa gaman af því að skoða myndir af flísalögn, ýtið hér

IMG_3936.jpg

Við létum þó ekki þar við sitja. Fólk þarf vatn. Fólk þarf að geta tannburstað sig. Fólk þarf vask. Þvottavél, handklæði og allskonar drasl. Við keyptum okkur hinn sívinsæla GODMORGON vaskaskáp frá IKEA, BRÅVIKEN vask og LUNDSKÄR blöndunartæki. Fyrst hafði ég hugsað mér að gera þetta í tveimur áföndum, svona aðeins að reyna að hugsa um fjármálin, en svo var frekar mikil rökleysa að bogra við að flísaleggja undir gamla vaskaskápinn og þurfa svo að rífa allt upp aftur þegar ég tímdi að kaupa mér vask. Vinnuaflið var líka til taks, mjög nauðsynlegur hluti af þessu öllu saman. Ég kann ekki að tengja vatnslás og hengja upp IKEA skáp án þess að lesa leiðbeiningarnar. Það kann hinsegar bróðir minn af ástæðum mér ókunnum. 

Nú held ég að það sé ekki eftir neinu að bíða. Ég ætla að leyfa myndunum að tala. 

IMG_0295.jpg
IMG_0309.jpg
IMG_0328.jpg
IMG_0340.jpg
IMG_0331.jpg
IMG_0312.jpg
IMG_0360.jpg

Ég hef áður sagt það, og segi það enn, það er mjög erfitt að taka eins fyrir og eftir mynd. Í hita leiksins á þetta alveg til að gleymast. Hér kemur okkar besta tilraun. Ég segi okkar, því það má víst ekki gleymast að þakka elskulegum ástmanni fyrir að taka myndirnar fyrir mig. Eins bróður fyrir að lána okkur nýju myndavélina sína sem gerði þetta allt saman mögulegt í janúar myrkrinu (þetta var í alvöru talað svona eins klukkutíma gluggi sem myndatakan var möguleg). Án ykkar væri ég ekkert, Ást.

fyrirogeftirbad.jpg