▴ edamame dumplings með truffluolíu ▴

Þegar við vorum í LA þá borðuðum við eitt kvöld á stað sem heitir True Food Kitchen. Á matseðlinum var forréttur sem hét Edamame Dumplings with Daikon Radish and White Truffle Oil. Halló! Allt sem ég elska , dumplingar (namm), edamame (namm) og truffluolía (namm, namm, namm). Við gerðum þau mistök að panta okkur einn skammt saman, ég á sem betur fer ágætan kærasta sem leyfði mér að borða meirihlutann af réttinum. Ég heimtaði svo að koma aftur nokkrum dögum seinna, mmm meiri dumplings.

Þegar heim var komið var augljóst að ég þurfti að læra að búa til þessa snilld, ég gramsaði smá á internetinu og fann uppskrift sem ég notaðist við í grunninn. Í gærkvöldi var svo prufukeyrsla og niðurstaðan var svo góð að Hjalti sagði "betra en á þarna staðnum". Varla hægt að fá betra hrós.

Hér kemur uppskriftin, hún dugar í ca. 20 stk sem er fullkomið fyrir 4 í forrétt eða 2 í aðalrétt.

Fyllingin

  • 1 poki af edamame baunum*
  • 1/2 bolli / 120 ml. af mjólk
  • 1/4 bolli / 60 gr. af smjöri
  • 2 msk. truffluolía eða eftir smekk**
  • 1 msk. sítrónusafi eða eftir smekk
  • Salt og pipar eftir smekk (það þarf frekar mikið salt) 

Soðið 

  • 3 bollar / 700 ml. af vatni
  • 1/4 bolli / 25 gr. af þurkuðum shiitake sveppum***
  • 1 msk. rifið engifer
  • 1 skalottlaukur, fínt saxaður
  • 1 bolli / 235 ml. mirin****
  • 1/2 bolli / 120 ml. af soya sósu, helst Kikkoman
  • Olía til steikingar
  • Salt og pipar eftir smekk

Annað 

  • Einn pakki af wonton blöðum*****
  • Vorlaukur
  • Kóríander
  • Chilli  

1) Fyrsta skrefið er að leggja sveppina í bleyti. Ég setti mína í sjóðandi vatn í um það bil klukkutíma og það var passlegt. 

2) Næs þarf að afþýða edamame baunirnar, það dugar að láta þær liggja í heitu vatni í smá stund. Síðan tekur við það skemmtiverk að pikka baunirnar úr belgjunum. Þegar það er búið eru þær soðnar með mjólkinni og smjörinu í 15 mínútur. Maukið með töfrasprota. Truffluolíunni og sítrónusafanum hrært saman við og kryddað eftir smekk. 

3) Þegar sveppirnir eru búnir að liggja nógu lengi í bleyti þá eru þeir teknir upp úr vatninu og það geymt þangað til seinna. Skerið sveppina í strimla, ég tók stilkana frá afþví að mér fannst þeir heldur harðir en það getur verið mismunandi. Rífið engiferið (eða saxið smátt) og saxið  skalottlaukinn fínt. 

4) Steikið sveppina, engiferið og  skalottlaukinn í potti þar til að laukurinn er orðinn mjúkur og gegnsær (passið engiferið, það brennur auðveldlega). Eftir um það bil 2 mínútur er mirin-inu bætt út í og soðið niður um helming. Þá er soðinu af sveppunum helt út í ásamt soya sósunni. Kryddið eftir smekk. Sjóðið í nokkrar mínútur. 

5) Nú er ekkert eftir nema setja dumplingana saman. Það er auðveldara að sýna hvernig best er að gera þetta með myndum heldur en með orðum, ég fékk þessar myndir góðfúslega lánaðar af Love and Lemmons

edamame-dumplings3_loveandlemons.jpg
edamame-dumplings4_loveandlemons.jpg

Það fer ríflega ein teskeið af fyllingu á hvert blað og annað lagt ofan á. Til þess að "líma" blöðin saman er best að hafa litla skál með vatni hliðina á sér og strjúka með blautum putta eftir öllum brúnunum á öðru blaðinu. Mikilvægt er að passa að ekkert loft sé eftir inni i dumplingnum annars eru líkur á að hann detti í sundur í suðu.  

6) Dumplingarnir eru settir út í sjóðandi vatn (gott að setja ekki nema 8-10 í einu) og soðnir í 1-2 mínútur eða þar til þeir fara að fljóta. Best er að veiða þá upp úr með fiskispaða einn og einn og leyfa vatninu að gufa vel upp af þeim.  

7) Borið fram í djúpum diski. 4-5 dumplingar settir í hvern disk og ein góð ausa af soðinu hellt yfir. Skreytt að vild með kóríander, chilli og vorlauk.  

8) Borða og deyja úr hamingju. Fá sér meira og verða of saddur.

1382020_10153355894255302_1905890421_n.jpg
IMG_4009.JPG

* Edamame baunir eru ferskar soyjabaunir sem fást frosnar í Nóatúni, Krónunni, Hagkaupum og einstaka sinnum í Bónus. Þær fást líka í hinum ýmsu asísku matvörubúðum.

** Það fæst ágætis truffluolía í Hagkaupum (því minni sem flaskan er því betri). Hún er svolítið dýr en halelúja hún er best í heimi og gerir allt svo miklu miklu betra. 

***  Þurkaða shiitake sveppi er hægt að fá í asískum matvörubúðum. Ég fékk mína í þessari í Skeifunni.

**** Mirin er hrísgrjónavín sem er notað til matargerðar. Ég fékk mitt í Kosti en ég hef ekki séð það annars staðar. Ef einhver veit betur þá má hinn sami endilega láta mig vita þar sem að mitt er búið og það er langt í Kost.

***** Wonton blöð er hægt að fá í asískum matvörubúðum. Ég kaupi mína alltaf í Skeifunni og mér finnst þessir í grænu umbúðunum bestir.