▴ Stofan 2/2 ▴

Á sunnudagskvöldið skrifaði ég eftirfarandi: "Ég stend heldur betur við loforðin, og það á fyrsta degi vikunnar." Svo ekki orðinu meir, haha. En það er nú bara þriðjudagskvöld. Ekki svo slæmur árangur.

Byrjum á byrjuninni. Innflutningsdagur, 1. apríl 2011. Panell í loftinu, hangandi Rússar (the bad kind) og stofan virkar þrisvar sinnum minni. Myndin er líka minni, en það kemur málinu ekkert við.

24 tímum síðar. Loftið var málað hvítt og þvílíkur munur. Allt í drasli á þessari mynd en þið bara lítið fram hjá því.

Svo liðu tvö ár þar sem allskonar tilfæringar og breytingar á stofunni voru ekki myndaðar né skjalfestar. Um mitt ár 2013, eftir að ég fékk mér nýjan sófa, leit hún einhvernvegin svona út.

Og ef einhver er búinn að gleyma hversu frábær gamli sófinn minn var, gjöriði svo vel.

Þá hugsa ég að við séum stödd í lok febrúar 2014. Þá misstum við tímabundið vitið, stofan tekin í nefið samhliða því að stigaganginum var svo gott sem rústað og komið í ásættanlegt horf aftur.

Ég get reyndar ekki eignað mér neitt af breytingunum á stofunni. Hjalti minn hafði úrslita atkvæðið við valið á nýja skenkinum og tók svo alla málningarvinnuna að sér. Ég sat reyndar ekki aðgerðarlaus á meðan, halló múrbrot, halló spartl. Eftir að skenkurinn var kominn, en áður en að við máluðum leit þetta svona út. Afsakið svakalega léleg símamyndavélagæði. Já og Sigmund í sjónvarpinu.

Erfiðasta við þetta allt saman var að velja litinn á stofuna. Við sátum hérna í sófanum eitt kvöldið (þar sem ég sit/ligg núna) og ég hálf mumbla eitthvað hvort að það væri kannski næs að mála stofuna gráa. Hjalti greip þessa hugmynd heldur betur lofti og það var ekki aftur snúið. Ég hugsa að ég hafi eytt alla veganna 40 mínútum með litaprufunum í Húsasmiðjunni eftir að Hjalti var búinn að fara þangað og koma heim með 3 litaprufur sem voru allar hálf ómögulegar. Hversu erfitt er að finna gráan lit. 

Við enduðum á því að velja engan af ofangreindum litum. Heldur litinn sem er einum tóni ljósari heldur en efsta prufan í miðjunni. Hann heitir Morgendis og er nr. 9915 frá Jotun. Líkt og með baðherbergið og skrifstofuna þá tókum við litinn í supermöttu sem mér finnst koma frábærlega út. 

IMG_5739.jpg

Ég er mjög ánægð með útkomuna. Ég vildi fá alveg kaldan lit og þessi ætti að vera það enda alveg hrár grár (gott rím). Mér finnst ég samt sjá smá rauðan blæ á honum stundum, en ég held að það séu bara ljósin og parketið á plata mig. Næst verðum við kannski enn hugrakkari og förum einum tóni dekkra. 

En nóg af kjaftæði. Núna er komið að góða stöffinu. 

IMG_6572.jpg

Þetta skerpir svo á öllu! Listar og gluggar og listaverk verða þúsundsinnum fallegri eftir þessar breytingar.

Ohh hversu fallegt! Skennkurinn heitir Curat og er frá ILVA. Sagan af því hvernig við loksins fengum hann í hendurnar (í hendurnar, segir maður það kannski bara um börn?) er mjög löng og dramatísk og ég ætla því að hlífa ykkur við henni. Tímaritastandinn fékk ég fyrir um 2 árum í Habitat, á útsölu, fáránlega góð kaup. Nýjasta blómið, indjánafjöðrin, stendur á nýja uppáhalds hlutnum okkar, steyptum blómapotti (á hvolfi) sem er líka frá Habitat. Mögulega uppáhalds búðin mín.

Tímabundna heimili veggspjaldsins eftir hana Nynne Rosenvinge sem að ég fékk hjá Snúrunni.

IMG_5882.jpg

Ein í lokin, fyrir alla fyrir&eftir perrana.

fyrir&eftir.jpg

▴ Stofan 1/2▴

Skemmtilegar fréttir! UNDIR SÚÐ verður í smá innliti í sunnudagsblaði Morgunblaðsins um helgina. Það voru teknar myndir hér hátt og lágt í dag og ég hlakka mjög til þess að sjá útkomuna. Mæli með að allir næli sér í blaðið.

Þessi heimsókn minnti mig á að ég var aldrei búin að sýna ykkur myndir úr stofunni minni sem ég tók sama dag og Hús og híbýli komu við. Ég get því eiginlega ekki leyft ykkur að sjá stofuna eins og hún er eftir breytingarnar fyrr en að þið eruð búin að sjá hvernig hún var fyrir þær. Þannig að. Hér kemur þetta. Svo fái þið að sjá nýju myndirnar í næstu viku með smá forskoti á sunnudaginn.

Sjáiði fínu myndina okkar á veggnum? Nei, hélt einmitt ekki.

IMG_6164.jpg

Sótið á veggjunum er hinsvegar einstaklega áberandi. Lausnin? Mála yfir það.

IMG_6265.jpg

▴ what does the fox say? ▴

Þegar ég var að skrifa meistararitgerðina mína fann ég mér ótrúlegustu hluti til að gera annað en að skrifa, svona eins og að kaupa íbúð og fara ótal, ótal ferðir í Góða hirðinn. Þegar ég segi ótal þá meina ég óteljandi ótal. Ég held að ég hafi verið orðin fíkill á háu stigi. Þegar ég var búin að sanka að mér svo miklu dóti og allt of mörgum bókum þá ákvað ég að reyna að hafa smá hemil á mér. Þú veist, fara bara einu sinni í mánuði ekki einu sinni í viku. Það tókst ágætlega en mér finnst samt enn alveg rosalega skemmtilegt að fara þarna og gramsla og tala nú ekki um ef að ég finn eitthvað frábært á svo gott sem engan pening. Reyndar finnst mér verðin hjá þeim hafa hækkað óþarflega mikið en það er önnur saga. 

Allavegana. Í september á síðast ári þá keypti ég ótrúlega fallega mynd frá twamies á Etsy (önnur uppáhaldsbúð ef út í það er farið). Eftir að hún var komin til landsins tók endalausan tíma að finna ramma, ég viðurkenni þó að ég fór kannski ekki í allar réttu búðirnar en ég var alltaf með augun opin, en það virðist ekki vera til of mikið af römmum sem eru hvítir ferningar. 

Lausnina fann ég í Góða hirðinum um daginn. Ég keypti gamlan fallegan ramma sem passaði akkurat fyrir myndina og málaði hann hvítan. 

IMG_5778.jpg

Það eina sem þarf fyrir svona yfirhalningu er:

  • Málning og pensill.

Ég notaði LADY Interior Finish frá Jotun. Þetta er mjög þægileg málning á allt tréverk, hún er með akrílgrunni þannig að það er líka auðvelt að þrífa pensla og skítuga putta eftir á. 

Ég þurfi að mála þrjár umferðir á rammann. Hérna er hann eftir eina...

... og eftir þrjár.

Ég er mjög ánægð með loka niðurstöðuna. Líka algjör munur að borga ekki nema 100 kr. og eina kvöldstund af dundi fyrir rammann. Verkefnið tók mig ekki nema 3 tíma að þurktíma meðtöldum. Fínt föndur á mánudagskvöldi. Myndin úr rammanum fannst mér reyndar mjög falleg. Kannski finn ég heimili fyrir hana einhvern tímann seinna. 

IMG_5774.jpg

Rebbi litli á núna heima inni á baði. Mér finnst eitthvað svo huggulegt að hafa list á baðherberginu. 

Nú er bara um að gera að finna gamla ramma og mála þá í öllum regnbogans litum.

▴ BAÐIÐ ▴

Það er komið að  því. Baðið er tilbúið. Það er búið að taka af því myndir. Síðasti naglinn var nelgdur í vegginn í gær um það bil 3 sekúndum áður en fyrsta myndin var tekin. 

Fyrst smá upprifjun. Svona leit baðherbergið út þegar ég flutti inn. Ekki svo slæmt myndi einhver líklega einhver hugsa en eftir að hafa búið hérna í smá tíma þá fengum við mjög mikla leið á panelnum í loftinu og vaskaskápurinn var einstaklega illa hannaður. Eina sem hann gerði (utan við að geyma vaskinn) var að taka pláss án þess að í honum væri nokkurt geymslupláss og hægt og rólega flagna og fara í taugarnar á mér. 

tumblr_lj7ewryLS11qgux35.jpg

Svo máluðum við loftið og veggina. Þá leit þetta einhvern veginn svona út. 

bad1.jpg

Svo var brotið og flísalagt, flísalagt og flísalagt. Þeir sem eru búnir að gleyma eða bara hafa gaman af því að skoða myndir af flísalögn, ýtið hér

IMG_3936.jpg

Við létum þó ekki þar við sitja. Fólk þarf vatn. Fólk þarf að geta tannburstað sig. Fólk þarf vask. Þvottavél, handklæði og allskonar drasl. Við keyptum okkur hinn sívinsæla GODMORGON vaskaskáp frá IKEA, BRÅVIKEN vask og LUNDSKÄR blöndunartæki. Fyrst hafði ég hugsað mér að gera þetta í tveimur áföndum, svona aðeins að reyna að hugsa um fjármálin, en svo var frekar mikil rökleysa að bogra við að flísaleggja undir gamla vaskaskápinn og þurfa svo að rífa allt upp aftur þegar ég tímdi að kaupa mér vask. Vinnuaflið var líka til taks, mjög nauðsynlegur hluti af þessu öllu saman. Ég kann ekki að tengja vatnslás og hengja upp IKEA skáp án þess að lesa leiðbeiningarnar. Það kann hinsegar bróðir minn af ástæðum mér ókunnum. 

Nú held ég að það sé ekki eftir neinu að bíða. Ég ætla að leyfa myndunum að tala. 

IMG_0295.jpg
IMG_0309.jpg
IMG_0328.jpg
IMG_0340.jpg
IMG_0331.jpg
IMG_0312.jpg
IMG_0360.jpg

Ég hef áður sagt það, og segi það enn, það er mjög erfitt að taka eins fyrir og eftir mynd. Í hita leiksins á þetta alveg til að gleymast. Hér kemur okkar besta tilraun. Ég segi okkar, því það má víst ekki gleymast að þakka elskulegum ástmanni fyrir að taka myndirnar fyrir mig. Eins bróður fyrir að lána okkur nýju myndavélina sína sem gerði þetta allt saman mögulegt í janúar myrkrinu (þetta var í alvöru talað svona eins klukkutíma gluggi sem myndatakan var möguleg). Án ykkar væri ég ekkert, Ást.

fyrirogeftirbad.jpg